Maileguak eskatu, zergak eta isunak ordaindu, aseguru eta hipotekak kontratatu, Ibilgailuen Azterketa Teknikoa (IAT) egiteko aldez aurreko hitzordua eskatu, fakturak egin, etxe bat erosi... tramiteen uneren batean (guztietan ez bada) gure presentzia fisikoa eskatzen duten jarduera batzuk dira. Horrez gain, zenbat aldiz entzun behar izan dugu horrelako zerbait?

- Ene, 285 inprimakia betetzea falta zaizu... etor zaitez bihar

Pentsa ezazu tramite horiek guztiak edozein unetan eta etxetik mugitu gabe egiteko aukera dugula. Hori dagoeneko egin litekeen gauza da, nahiz eta oraindik gestio gutxi batzuk baino ezin diren Internetez egin. Hala ere, egunez egun gero eta aukera gehiago dago, bai eta “bulego birtualak” erabiltzen dituen pertsona gehiago ere.

• Bankuko gestioak: zalantzarik gabe, internautek gehien erabiltzen duten zerbitzua da. Gure bankuan kontu bat zabaltzean eta kutxazain automatikoetan erabili ohi diren edozein txartel eskatzean, bankuko web orrian bankuko gestio ia guztiak egin ahal izateko gakoak ere jasotzen ditugu. Besteak beste: transferentziak, akzioen negoziazioa, saldoen kontsulta, ordainagirien azterketa, etab.